त्रिदल पुणे (पुण्यभूषण फाऊंडेशन) च्या वतीने देण्यात येणाऱ्या 'पक्के पुणेकर' सन्मानाने यावर्षी महाराष्ट्र एज्युकेशन सोसायटीचा गौरव करण्यात आला. पुण्याच्या शैक्षणिक, सामाजिक, सांस्कृतिक जीवनात मोलाचे कार्य करून शंभर वर्षे पूर्ण केल्याबद्दल कृतज्ञता म्हणून पुणेकरांच्या वतीने 'मएसो'ला सन्मानित करण्यात आले आहे. संस्थेच्या नियामक मंडळाचे अध्यक्ष मा. राजीवजी सहस्रबुद्धे, उपाध्यक्ष डॉ. माधव भट, नियामक मंडळाचे सदस्य अॅड. धनंजय खुर्जेकर आणि संस्थेचे सचिव डॉ. भरत व्हनकटे यांनी संस्थेच्या वतीने रमेश शहा (लायन डिस्ट्रिक्ट गव्हर्नर) यांच्या हस्ते हा पुरस्कार स्वीकारला. मानपत्र, स्मृतिचिन्ह असे या पुरस्काराचे स्वरुप आहे. बालगंधर्व रंगमंदिरात मंगळवार, दि. 6 नोव्हेंबर रोजी पहाटे झालेल्या या गौरव सोहळ्याला ज्येष्ठ उद्योगपती कृष्णकुमार गोयल प्रमुख पाहुणे म्हणून उपस्थित होते. पुण्यभूषण फाउंडेशनचे डॉ सतीश देसाई, युवराज शहा आदी मान्यवर व्यासपीठावर उपस्थित होते.